ნანახია: 1430

გლობალური ფინანსური კრიზისის შესახებ აშშ-ში განხილვები კვლავ გრძელდება. CIBC World Markets-ის ანალიტიკოსები იმ აზრისკენ იხრებიან, რომ კრიზისი განვითარებად ქვეყნებში მომუშავე ნავთობმომპოვებლებმა გამოიწვიეს. ამ დღეებში ექსპერტების მიერ გამოქვეყნებული კვლევის მიხედვით, ნავთობზე ხუთმაგად გაზრდილმა ფასმა, რომელიც ბოლო ექვს წელიწადში რეკორდული იყო, უფრო მეტად შეუწყო ხელი ფინანსური კრიზისის წარმოშობას, ვიდრე აშშ-ში განვითარებულმა იპოთეკური დაკრედიტების პრობლემებმა. როგორც ჩანს, ექსპერტთა ნაწილს არ სურს გლობალური ფინანსური პრობლემის პროვოცირებაში ამერიკის ხელისუფლების მიერ ფინანსური რეგულირების სფეროში გაუაზრებელი პოლიტიკა მიიჩნიოს. აღნიშნულ კვლევაში ექსპერტები ჯეფ რუბენი და პიტერ ბიუკენენი სვამენ კითხვას - თუ როგორ შეიძლებოდა ემოქმედა ამერიკის უძრავი ქონების ბაზარზე განვითარებულ კრიზისს იაპონიასა და ევროკავშირის ქვეყნებზე, თანაც უფრო ადრეულ ეტაპზე, ვიდრე კრიზისი ამერიკაში დაიწყებოდა. კრიზისის გამოწვევაში ისინი წამყვან ნავთობმწარმოებლებს ადანაშაულებენ. უნდა ითქვას, რომ ამ მოსაზრებას მნიშვნელოვანი მხარდაჭერა არ აქვს. BMO Capital Markets-ის ეკონომისტი დაგა პორტერი მიიჩნევს, რომ არსებული მძიმე ეკონომიკური მდგომარეობა სწორედ ამერიკაში იპოთეკური დაკრედიტების ბრალია, ხოლო ბარელ ნავთობზე ფასის 140 აშშ დოლარამდე აწევამ კიდევ უფრო დაამძიმა ისედაც მძიმე მდგომარეობა. CIBC World Markets - ის ანალიტიკოსების მოსაზრებების წინააღმდეგ კანადურ მედიაში თავისი მოსაზრება დააფიქსირა უნივერსიტეტის ეკონომისტმა კალგარ ფრენკ ატკინსმაც, რომელიც მიიჩნევს, რომ არავითარი პირდაპირი მტკიცებულება იმისა, რომ ნავთობზე მაღალმა ფასმა გამოიწვია ფინანსური კრიზისი, არ არსებობს.