ნანახია: 732

"წუთისოფელი ომია,
ომი ფუტკრის და კრაზანის,
აქლემის ქურდი ნემსის ქურდს
ხვდება, ციხეში აგზავნის!"

ბიზნესის დაწყება საქართველოში იოლია. ჩვენ, თურმე, ამ მხრივ, მსოფლიო ჩემპიონები ვართ
ბიზნესის დამთავრებაც ძალიან იოლია, თუ რომელიმე ხელისუფალი "კრიშად" არ გახურავს

მართმსაჯულება მავანთა დაკვეთას ასრულებს

იქ სადაც "ჯეოსელს 101 მილიონს პატიობენ, "რუსთავი-2"-ს, "იმედს" და საზოგადოებრივ მაუწყებელს 30 მილიონს, ქვეყანაში, რომელიც "პირამიდებმა" წალეკა და გაჩერებული მშენებლობების ბუმია, სადაც ბანკებმა თავიანთი ცოდვების და შეცდომების გასასწორებლად 800 მილიონამდე მიიღეს სახემწიფოსაგან. 3 000 კაცის დამსაქმებელს, აგვისტოს ომისა და მსოფლიო ეკონომიკური კრიზისის ფონზე 7 მილიონი ლარის ვალდებულებების დაფარვის დაგვიანებისთვის ჯერ ბიზნესს ართმევენ და მერე იჭერენ

ასეთი პედანტურები იქნებ ხელისუფლებასთან დაახლოებული ბიზნესმენების მიმართაც იყონ - კობა ნაყოფია, დავით ბეჟუაშვილი, დავით კეზერაშვილი, გიორგი რამიშვილი(ზარალა), ცეზარ ჩოჩელი, რეზო შარანგია, რუსუდან კერვალიშვილი, კახა ბენდუქიძე...
მათ ბიზნესებს ხელს ვერავინ ახლებს, ვერც სამართლიანად დაარიცხავენ ჯარიმას, ერთ თეთრსაც კი...

ანზორ ქოქოლაძე რა "ზანგია"? თუ ხელვაჩაურის რაიონში რომ არის დაბადებული და გაზრდილი, ამიტომ ვერ იპოვა ადგილი ბიზნეს-ელიტაში

იმ ბათუმში, ევროპაში ყველაზე გრძელი ბულვარი რომ კეთდება შეიხის ნაჩუქარი პალმებით, იქნებ ერთი აჭარელი(აჭარაში დაბადებულ და გაზრდილ ნებისმიერ მოქალაქეს ვგულისხმობ) ბიზნესმენი დაასახელოთ, ვინც იქ ბიზნესს აკეთებს. ერტი თემურ ჭყონია "შეეპარათ", ვგონებ, დროებით

თავი დაანებეთ "TBC - ჯგუფს". მამუკა ხაზარაძე არაფერ შუაშია. იგი იძულებულია ანგარიში გაუწიოს მავანთა ზეწოლას, რომლებმაც ბაზრის კონკრეტული სეგმენტიდან ქოქოლაძის გაგდება ჯერ კიდევ 2007 წელს ჩაიფიქრეს, როცა "ელიტ-ელექტრონიქსმა" ბაზრის 50% დაიკავა და კომპანიაში ფინანსური პოლიცია შევიდა. როდის იყო "TBC - ჯგუფს" ისეთი წვრილმანი ბიზნესები აინტერესებდა, როგორიც ტექნიკით ვაჭრობაა და როდის იყო იგი 5 მილიონიან მსესხებელს საფლავში მიყვებოდა...

პრეზიდენტი საამისოდ ვერ მოიცლის. მე მივმართავ დღევანდელი ქართული სახელწიფოს ორ უმნიშვნელოვანეს ლიდერს - ბატონ ვანო მერაბიშვილს და ზურაბ ადეიშვილს. თქვენ კანონიერების გარანტი ბრძანდებით დღევანდელ საქართველოში. გთხოვთ, აღკვეთოთ ეს უსამართლობა და გაათავისუფლოთ ბიზნესმენი ანზორ ქოქოლაძე, ხოლო საქმის გამოძიების პროცესი აიყვანოთ პირად კონტროლზე. თუ ქოქოლაძისნაირი ხალხი უსამართლოდ დაისჯება, საქართველო ვერასდროს გახდება ერთიანი და აყვავებული.

ვაჟა ბერიძე
გაზეთი "ბანკები და ფინანსების" სარედაქციო საბჭოს თავმჯდომარე