ნანახია: 495

საქართველოს კათოლიკოს-პატრიარქი ილია II ქუთაისში საქართველოს პარლამენტის გადატანის იდეას მოუმზადებელს უწოდებს და პოლიტიკოსებს საკითხის მიმართ მეტი დაფიქრებისკენ მოუწოდებს. პატრიარქმა ამის შესახებ 14 ივლისს, საქართველოს საპატრიარქოში, ხელნაწერთა ეროვნული ცენტრის მეგობართა საზოგადოების წევრებთან შეხვედრაზე ბრძანა. მასში საზოგადოების სხვადასხვა სფეროს წარმომადგენლებთან ერთად, საპარლამენტო უმრავლესობიდან ნუგზარ წიკლაური, რუსუდან კერვალიშვილი, ხოლო უმცირესობიდან გიორგი თარგამაძე მონაწილეობდნენ.
"დღეს თქვენ იცით, რომ საუბარია საქართველოს პარლამენტის ქუთაისში გადატანაზე. ვფიქრობ, რომ ასეთი გადაწყვეტილება ნაჩქარევია და პოლიტიკოსების მხრიდან დაფიქრებას მოითხოვს" - ბრძანა პატრიარქმა.
საქართველოს პატრიარქმა ასეთი განცხადება ხელნაწერთა ეროვნული ცენტრის მეგობართა საზოგადოების საქმიანობის შეფასებისას გააკეთა. მეგობართა საზოგადოების მზიანია უნიკალური, განსაკუთრებული ეროვნული მნიშვნელობის კოლექციის კვლევა, დაცვა და პოპულარიზაცია, თუმცა ცენტრს დღემდე სათანადო შენობა არ აქვს.
პატრიარქის შეფასებით, "თუკი საქართველოს პარლამენტი ქუთაისში გადავა, კარგი იქნება ეს ახალი შენობა ეროვნული ხელნაწერების შენახვისა და დაცვის მიზნით გამოყენებულ იქნეს" - აღნიშნა პატრიარქმა
როგორც მედიანიუსს საქართველოს პარლამენტის ვიცე-სპიკერმა რუსუდან კერვალიშვილმა განუცხადა, პატრიარქის შეფასება ქუთაისში პარლამენტის შენობის გადატანასთან დაკავშირებით, უნდა განვიხილოთ ისეთ მდგომარეობად, `როდესაც პატრიარქი გულისხმობდა, რომ საკანონმდებლო ორგანოს რეგიონში გადატანით, რატომღაც დეპუტატები მოკლებულნი იქნებოდნენ ხალხთან ურთიერთობას.
ცნობისთვის: პატრიარქის განცხადება მოცემულ საკითხთან დაკავშირებით პირველ შეფასებას წარმოადგენს.
უმაღლესი სასაკონმდებლო ორგანოს ქუთაისში გადატანის ინიციატივით, 2009 წელს ქუთაისის მაჟორიტარი დეპუტატი აკაკი ბობოხიძე გამოვიდა. პრეზიდენტის საკანონმდებლო ინიციატივის თანახმად, 2013 წლიდან პარლამენტი საქმიანობას თბილისსა და ქუთაისში განახორციელებს. პარლამენტის ახალ შენობას კომპანია `მაგი სტილი გასული წლის დეკემბერში აფეთქებული `დიდების მემორიალის ადგილას აშენებს.

"მედიანიუსი"