ნანახია: 462

მსოფლიოს საბაჟო ორგანიზაციამ ივლისის ბოლოს სიგარეტის კონტრაბანდის შესახებ ანგარიში გამოაქვეყნა.
ამის შესახებ ინფორმაცია საინფორმაციო პორტალმა tabak.ua გაავრცელა. მსოფლიო საბაჟო ორგანიზაციის ანგარიშში, რომელიც 68 წევრი ქვეყნის მონაცემებს აერთიანებს, განმარტებულია რომ 2008-2009 წლების განმავლობაში კონფისკაციის 4 000-ზე მეტი შემთხვევა დაფიქსირდა.
ჩამორთმეული სიგარეტი ქვეყნის წარმომავლობის პარამეტრის მიხედვით აღირიცხება. კონფისკაციის დაფიქსირებული შემთხვევიდან 38% (1 020) უკრაინაზე მოდის.
ორგანიზაციაში განმარტავენ, რომ ჩამორთმეული სიგარეტების რაოდენობის მიხედვით, უკრაიანა ჩინეთის, არაბეთის გაერთიანებული საემიროებისა და საბერძნეთის შემდეგ მეოთხე ადგილს იკავებს, კონფისკაციის მიხედვით კი პირველს.
უკრაინულ სიგარეტს უმეტესად პოლონელი მესაზღვრეები "იჭერენ", მაგალითად, ქალაქ დოროხუსკში სიგარეტის 411 პარტია იქნა ჩამორთმეული.
უკრაინაში 2009 წელს ლეგალურად 112 მლრდ. სიგარეტია რეალიზებული, თუმცა უკრაინის ტერიტორიაზე მხოლოდ 70 მლრდ. სიგარეტის მოხმარება მოხდა.
ეს იმას ნიშნავს, რომ უკრაინიდან შარშან სხვადასხვა გზით დაახლოებით 40 მლრდ. სიგარეტია გატანილი. შესაბამისად, კონტრაბანდის მაღალი მაჩვენებლის არსებობა იმით აიხსნება, რომ უკრაინასა და ევროკავშირის ქვეყნებში სიგარეტზე აქციზის გადასახადსა და სიგარეტის ფასს შორის დიდი სხვაობაა.
მაგალითად, პოლონეთში ერთი კოლოფი სიგარეტი საშუალოდ 2,55 აშშ დოლარი (20 გრივნა) ღირს, უკრაინაში კი - 0,76 აშშ დოლარი (6 გრივნა).
მსოფლიო საბაჟო ორგანიზაციის მდივნის კუნიო მიკურიას განმარტებით, მსოფლიომ სიგარეტით არალეგალურ ვაჭრობაზე რომ გაიმარჯვოს, მსოფლიოს ქვეყნები დამატებით 31 მლრდ. აშშ დოლარს მიიღებდნენ და 160 ათასი ადამიანის სიცოცხლის გადარჩენას შეძლებდნენ.