ნანახია: 1351

თვითნასწავლმა დიზაინერმა, რომელიც ულამაზეს სამკაულებს ქმნის, "თბილისის მოდის კვირეულზე" საზოგადოება აღაფრთოვანა. მაია მიქაშავიძის უნიკალური სამკაულები ქალბატონების ოცნებად იქცა. სამკაულები ძვირფასი, ნახევრადძვირფასი თვლებისგან და მასალისგან არის გაკეთებული, როგორიცაა: მარგალიტი, ფირუზი, მარჯანი, სვაროვსკი, ლაზურიტი, ვენეციური შუშები, ჩეხური ძოწი, სადაფი, კვარცი, ბროლი ასევე მეტალები, ქსოვილები, მაქმანები, ნიჟარა, ეგრეთწოდებული "ბისკვიტის" დეტალები და ა.შ. დიზაინერი ამბობს, რომ ეს საქმე თავად ისწავლა, მას შემდეგ, როცა დუბაიში ყოფნისას ის მასალა ნახა, რითაც დღეს სამკაულებს ამზადებს. "ბოლო წლები სხვადასხვა საქმიანობით ვიყავი დაკავებული და ჩემი საქმე ყველგან წარმატებული იყო, მაგრამ მას შემდეგ, რაც პირველი გულსაბნევი შევქმენი და ძალიან კარგი გამოვიდა, საყურეების და სხვა სამკაულების გაკეთებაც დავიწყე. 2008 წელს პირველი გამოფენა "კოპალაში" მქონდა. ავთო ცქვიტინიძემ მიბიძგა, რომ ჩემი სამკაულების გამოფენა გამეკეთებინა. გამოფენაზე ისეთი დიდი დაინტერესება გამოიწვია ჩემმა სამკაულებმა, რომ იძულებული ვიყავი გამეყიდა. 2008 წლიდან დღემდე სხვადასხვა გამოფენა გაყიდვები მქონდა. ყოველ გამოფენაზე სულ უფრო მეტი ადამიანი ინტერესდება ჩემი სამკაულებით",- ამბობს მაია მიქაშავიძე. მისი სამკაულებით აღფრთოვანებულმა, ჰოლანდიაში მცხოვრებმა კატია წერეთელმა ქალაქ სიტარტში მაია მიქაშავიძის სახელობის მაღაზია გახსნა, სადაც სამკაულები წარმატებით იყიდება. თვითნასწავლ დიზაინერს მოწვევა აქვს გამოფენის გასამართად იტალიიდან. მაია მიქაშავიძე რომში გამოფენის გამართვას შემოდგომით, სექტემბრისთვის გეგმავს.
მაია მიქაშავიძის სამკაულები ძალიან წარმატებით იყიდება, თუმცა მისი შეძენა მხოლოდ გამოფენა გაყიდვებზე არის შესაძლებელი. მაია მიქაშავიძის სამკაულების გამოფენა ივნისის შუა რიცხვებში არის დაგეგმილი.. სამკაულების ფასი სხვადასხვაა, მისი ნაკეთობის და გამოყენებული მასალის მიხედვით. ყველა სამკაულში დიდი სიყვარული, დახვეწილი გემოვნება და უდიდესი ნიჭიერება იკვეთება. მაია მიქაშავიძის თითოეული სამკაული ექსკლუზიურია და არ მეორდება. "ღმერთს სურს, რომ მე ეს საქმე ვაკეთო და ამიტომ გამოდის ჩემი სამკაულები ასეთი ლამაზი",- პასუხობს მაია მიქაშავიძე, როცა სამკაულების სილამაზით გაოცებულები ვეკითხებით, რაში არის მისი სამკაულების სილამაზის საიდუმლო.
მაია მიქაშავიძეს მისი ულამაზესი სამკაულების გამოფენის მოსაწყობად, ევროპის საგამოფენო დარბაზებში არაერთი მიპატიჟება აქვს.
ადა ექიზაშვილი